Mar 1 | MHL | STEP | Aria Yeesus Krais Iinan Mua Maneka muuka-ke. Ona opor eliwa ne sira eliwa onak nain wiar amisarep siisimemik. Opor onoma feenap.

Mark 1

Yon Baptais-ke Yeesus maemi wia maakek

(Matiu 3.1-12, Luk 3.1-9 ne 3.15-17, Yon 1.19-28)

1 Aria Yeesus Krais Iinan Mua Maneka muuka-ke. Ona opor eliwa ne sira eliwa onak nain wiar amisarep siisimemik. Opor onoma feenap. 2 Iiriw ekera Mua Maneka-ke ona opora muuka maakek nain profet Aisaiya-ke wiar amisarep feenap siisimok,

“No miime, ikoka sesel mua oko sesekinen. Ne os-ke miimep ikiwemi no era eepominon.
(Malakai 3.1)

3 Ne ikoka epa asia nomon manekiw nan feenap faremi maem-ikainon, ‘Niena Maneka era saliwomaka ne era kakenomaka!’”
(Aisaiya 40.3)

4 Aria opora naap ikaeya Yon Baptais epa asia nomon manekiw nan kererep mua unowa opora naap wia wafuromami feenap wia maakek, “Ni unowiya kema kirep pina wasirkiwkin-na nia yasuwamkun Mua Maneka-ke pina niar iirarinon.” 5 Iir nain wi Yuudia ne Yerusalem owow maneka emeria mua unowa Yon wiar ikiwemik. Ne pina wasirkiwkin Yodan eka-pa wia yasuwam-ikua.

6 Yon mia suuwowa maa eneka kamel afifiw onimik nain wuap inakirowa maa eneka kanima-pa onimik nain mia ara kaikap yiawem-miek. Ne maa enowa aawa ne puusum eka nain enem-ikua. 7 Ne opora wia wafuromami feenap maem-ikua, “Mua oko yo murarep ekapinon. O kekanowa-ke yo kekanowa efar nomakek. Yo mua meta marew akeniya o taar teekow mua murarow akena-pa wiar ikem. 8 Yo aakisa oram eka-pa nia yasuwiyem. Ne ikoka os-ke ekapemi Ewar Eliwa nieya ni anane kekanep ikowen.”

Yon Baptais-ke Yeesus yasuwak

(Matiu 3.13-17, Luk 3.21-22)

9 Aria iir nain Yon wi emeria mua opora wia maakem-ikaeya Yeesus Galili kame-pa ikok ona owowa Nasaret piipuap ekapok. Yon wiar ekapeya Yodan eka-pa yasuwak. 10 Ne Yeesus eka pona urupem-ikok maa oko urufak, maa nain aapereka aakiareya Mua Maneka Ewar-ke nepa ibiamun saarik imenarep o wiar orok. 11 Aria iinan-pa mua iwakara-ko feenap maeya miimamik, “No yena Muuka-ke, yena kema muneka-ke. Yo manek akena nefa kookaliyem.”

Satan Yeesus akimak

(Matiu 4.1-11, Luk 4.1-13)

12 Aria ewur akena Mua Maneka Ewar-ke Yeesus aawep epa asia nomon manekiw nan amapikiwok. 13 Ne fofa ten erepam nan ikaeya Satan-ke kema akimam-ikua. Ne epa nain pun maa eneka asia unow akena. O nan ikaeya wi ensel-ke ekapemi ane-kekanowamik.

Yeesus Galili kame-pa ona uuwowa onoma wuak

(Matiu 4.12-17, Luk 4.14-15)

14 Aria Yon opap koora-pa wuiwkin Yeesus Galili kame wiar ikiwok. Ikiwep Mua Maneka opor eliwa emeria mua wia maakem-ikua. 15 Feenap maem-ikua, “Iiriw Mua Maneka epa pepekimok nain aakisa kererek. Mua Maneka pika kemena-pa ikowa nain epa fanek. Ni kema kireka. Ne pun Mua Maneka opora kekanowa opaka.”

Yeesus mua erepam wia fareya ookamik

(Matiu 4.18-22, Luk 5.1-11)

16 Iir oko Yeesus Galili eka saawirinowa pona-pa ikiwem-ikok Saimon urufak, ona weepe Andru ikos ikaiwkin. Wiam erup mera aawow mua-ke, ne eka-pa mera sia wafuram-ikemik. 17 Ne wia maakek, “Aria, ni ekapep yo yookeka. Ne yos-ke mua wia aawowa nia ofakowinen.” 18 Naap wia maakeya ewur akena mera sia nan wuap-puap ookamik.

19 Aria naap iram-ikok Sebedi muuka wiam erup, Yems Yon ikos wia urufak. Wi wiena aasa-pa ikok mera sia fuluwa piitam-ikemik. 20 Wia urufap wia fareya wiawi piipuap o ookamik, wiena wiawi wi mauwow mua wiamiya aasa-pa nan ikemik.

Mua oko sawur mia-pa wiar ikaeya Yeesus-ke iiraromak

(Luk 4.31-37)

21 Wi teeria nain Yeesus wameiya Kapeneam ikiwemik. Ikiwep nan ikaiwkin Sabat fofa naeya lotu koora ikiwemik. Koor kemena-pa Yeesus-ke Mua Maneka opora suule wia onak. ^{▼▼1.21Sabat fofa wi Yuuda mua wiena uurarowa ne lotu fofa-ke. Wi fofa nain maa me uuwimik.} 22 Ne wi opora wiar miimap soranemik. Moram o opora wia maakek nain ona kekanowa onaiya ikua. Ne wi sira amis mua suule wiemik naap weetak.

23 Ne mua oko lotu koora-pa nan ikua. Mua nain sawur-ke anirawap ikaeya Yeesus urufap kiriremi maek, 24 “No Nasaret mua Yeesus, no maa mauwa yia onekam naep fan ekapon? I yia samorowa naep-i? Yo nefa amisarem, no Mua Maneka-ke nefa sesekak nain-ke!” 25 Naap maeya Yeesus-ke kakankami maakek, “No poporaremi mua fain piipue!” 26 Naap maakeya sawur mua mia-pa wiar ikua nain ikiwemi uufun-iraparemi kerew akena kiriremi piipuak. 27 Ne wi nan ikemik nain-ke naap urufap soranep opaimika tenep erap ikemik. Ne wi-wieniw aakunemi maemik, “Nee, sira fain kamenap nain-ke? Opora faa enuma-ke. Mua fain kekanowa onaiya ikok sawur wia maakeya opora wiar miimamik.” 28 Naapeya Yeesus meta manekarowa ewurareya Galili kame mua unowa nain miimamik.

Yeesus Pita emeria onak wiar saliwak

(Matiu 8.14-15, Luk 4.38-39)

29 Ne Yeesus ona teeria onaiya lotu koora piipuap oromi Saimon Andru ikos koora wiar ikiwemik. Ne Yems, Yon ikos pun wi wiokamik. 30 Saimon emeria onak mia keenep esimsa-pa inep ikua. Wi fuuniwkin Yeesus maakemik. 31 Naeya emeria nain wiar ekap wapena-pa opap iikiroweya napuma nain wiar sariarek. Ne maa wia uupomak.

Yeesus napum mua unowa wia saliwak

(Matiu 8.16-17, Luk 4.40-41)

32 Ne urera ama oreya napum mua unowa Yeesus amapekapomakemik. Wi emeria mua sawur-ke wia anirawap ikemik nain pun wia pekapemik. 33 Ne unow akeniya koora nain iiwawun takunemik. Koor omopora pun iiwawun mua-keriw aremik. 34 Ne Yeesus-ke napum sira-sira aawemik nain iiwawun wia saliwomakek. Ne wi sawur pun mia-pa unow akena wia iirarek. Ne wi sawur nain o amisaremik. Naapeya wi aakunowa nain emi wia wuak.

Yeesus Galili kame-pa uuwowa onak

(Luk 4.42-44)

35 Ne iir oko-pa uuriw akena epa kokoma ikaeya Yeesus iikirami epa oko mua marewa nain ikiwok. Ikiwep nan ikok Mua Maneka kema suuwami farem-ikua. 36 Nan ikaeya Saimon ame-ke murarep o akup-ikiwemik. 37 Ikip imenap maakemik, “Nee, mua unowa no nefa akupimik.” 38 Ne wia maakek, “I owowa papako mamaiya nain ikiwu. Yo Mua Maneka opora owowa nain pun wia maakinen. Moram yo mauwowa muut nain orom.”

39 Aria o Galili kame-pa naap ikiwemi lotu koora-pa Mua Maneka opora wia wafuromami sawur wia iirarem-miek.

Yeesus mua mia gigir wiar saliwak

(Matiu 8.1-4, Luk 5.12-16)

40 Aria iir oko mua oko mia gigir maneka nain-ke Yeesus wiar ekapemi keema muuna mikap omawami maek, “Aa, nena kookalep-na eliw efa saliweya mia eliwa arinen.” 41 Naap maakeya Yeesus-ke kemalep wapeniw tiimami maakek, “Eliw. No sariare!” 42 Naap maem-ikaeya napuma nain weeseremi mia eliwa wiar imenarek. 43 Ne Yeesus-ke sesekami opora kekanowa maakek, “Yo nefa saliwam nain ikiwemi mua oko me wia maake. Wi pris wiar ikiweya mia nefar pupuk. Ne Moses sira wuak nain wiar ookami Mua Maneka patireya nefa mauk, ‘O sariarek.’ Naap nefa mauk.”

45 Naap maakek-na wia, ikiwemi feenap maem-miek, “Yeesus-ke efa saliwak.” Naeya owow unowa nain Yeesus meta wiar miimamik. Naapeya o owow maneka wiar ikiwowa me pepek. Ne baurarep epa mua marew neeke ikiwep nan ikua. Ne wia, owow unowa emeria mua-keriw wiar ekapem-ikemik.